Ճանապարհապարեկային ծառայության տեսուչի պարտականությունները տրանսպորտային միջոցները հատուկ տարածք բերման ենթարկելու և արգելանքի տակ դնելու դեպքերում

Տրանսպորտային միջոցի երթևեկությունն արգելվում է, եթե`

• վարորդը տ.մ.-ը վարում է ոչ սթափ վիճակում.
• վարորդը զրկված է տ.մ.-ը վարելու իրավունքից.
• վարորդը տ.մ-ը վարում է առանց տվյալ կարգի տրանսպորտային միջոց վարելու իրավունքի.
• վարորդը տ.մ-ը վարում է ` իր մոտ չունենալով վարորդական վկայական.
• վարորդը տ.մ.-ը վարում է կեղծ կամ ուժը կորցրած վարորդական վկայականով.
• վարորդը տ.մ.-ը վարում է առանց վարորդական վկայականում նշված փաստաթղթերի կամ պարագաների.
• վարորդը տ.մ.-ը վարում է կեղծ հաշվառման վկայագրով կամ առանց հաշվառման վկայագրի.
• վարորդը տ.մ.-ը վարում է կեղծ, փոխված կամ ստանդարտին չհամապատասխանող հաշվառման համարանիշներով (ժամանակավոր համարանիշների դեպքում` նաև ժամկետանց համարանիշներով) կամ առանց հաշվառման համարանիշների.
• վարորդը տ.մ-ը վարում է առանց օրենսդրությամբ սահմանված փաստաթղթերի.
• տ.մ.-ը կամ տ.մ.-ի ներսում գտնվող անձը գտնվում է հետախուզման մեջ կամ կան հիմնավոր կասկածներ, որ տ.մ.-ով կատարվել է հանցագործություն, կամ դրա մեջ գտնվում են հանցագործություն նախապատրաստող, կատարող կամ կատարած անձինք.
• տ.մ.-ը պատճառ է դարձել այնպիսի ճանապարհատրանսպորտային պատահարի առաջացման, որի հետևանքով մարդու կյանքին կամ առողջությանը պատճառվել է վնաս, կամ այդպիսի պատահարի մասնակիցն է.
• սահմանված կարգով մուծված չէ այլ պետություններում հաշվառված, ինչպես նաև ծանրաքաշ և (կամ) մեծ եզրաչափերով (բեռով կամ առանց բեռի) տ.մ.-ներով Հայաստանի Հանրապետության ավտոմոբիլային ճանապարհներից օգտվելու համար նախատեսված ճանապարհային վճարը.
• տ.մ.-ը առանց համապատասխան թույլտվության կահավորված է առկայծող փարոսիկներով և (կամ) հատուկ ձայնային ազդանշաններով, կամ տ.մ.-ի թափքի արտաքին մակերևույթի վրա առանց համապատասխան թույլտվության փակցված են գունագծապատկերներ, գրառումներ և այլ նշումներ, կամ դրանք չեն համապատասխանում օրենսդրության կամ ստանդարտների պահանջներին.
• տ.մ.-ը կահավորված է կեղծված, փոփոխված (ջնջված) համարներ ունեցող ագրեգատներով կամ հանգույցներով:

Վերը թվարկված դեպքերում ճանապարհային երթևեկությունը կարգավորողը պարտավոր է սահմանված կարգով, տ.մ.-ը բերման ենթարկելով հատուկ տարածք, դնել արգելանքի տակ: Ընդ որում, եթե վարորդը տ.մ.-ը վարում է ոչ սթափ վիճակում կամ զրկված է տ.մ.-ը վարելու իրավունքից, կամ տ.մ.-ը վարում է առանց տվյալ կարգի տ.մ. վարելու իրավունքի, կամ տ.մ.-ը վարում է` իր մոտ չունենալով վարորդական վկայական, կամ վարորդը տ.մ.-ը վարում է կեղծ կամ ուժը կորցրած վարորդական վկայականով, կամ տ.մ.-ը վարում է առանց վարորդական վկայականում նշված փաստաթղթերի կամ պարագաների, ապա, տ.մ.-ի վարորդի համաձայնությամբ, տ.մ.-ը կարող է հանձնվել տվյալ կարգի տ.մ.-ը վարելու իրավունք ունեցող անձին:

Երթևեկության մասնակիցների համար խոչընդոտ ստեղծող կամ կայանումն արգելված տեղերում կանգնած տ.մ.-ը տեղափոխվում է հատուկ տարածք, եթե վարորդը տեղում չէ կամ հրաժարվում է վերացնել խոչընդոտը կամ կայանման կանոնների խախտումը:

Բերման ենթարկումը իրենից ներկայացնում է տ.մ.-ի օգտագործումը դադարեցնելու ժամանակավոր հարկադիր միջոց, որը ներառում է (վարչական իրավախախտման հայտնաբերման տեղում արգելանքի տակ դնելու պատճառը վերացնելու անհնարինության դեպքում) վերջինիս տեղափոխումը հատուկ տարածք:

Տ.մ.-ի տեղափոխումը հատուկ տարածք կատարում է իրավասու պաշտոնատար անձը` անձամբ կամ մեկ այլ տ.մ.-ի օգնությամբ:

Տ.մ.-ի վարորդի բացակայության դեպքում այն հատուկ տարածք բերման ենթարկելու մասին բերման ենթարկողն անհապաղ հայտնում է ոստիկանության տվյալ տարածքը սպասարկող ստորաբաժանում: Ստորաբաժանումը տ.մ.-ի սեփականատիրոջը կամ նրա ներկայացուցչին տեղեկացնում է տ.մ.-ի գտնվելու վայրի մասին: Տ.մ.-ի համարանիշները հանելը վարորդի բացակայության դեպքում օրենքը չի նախատեսում: Հետևապես, ՃՊԾ տեսուչի այդ գործողությունը համարվում է որպես իր լիազորությունների սահմանը անցնելը:

Տ.մ.-ը հատուկ տարածք բերման ենթարկելու և արգելանքի տակ դնելու վերաբերյալ իրավասու պաշտոնատար անձը կազմում է արձանագրություն, որի կրկնօրինակը հանձնվում է վարորդին:

Տ.մ.-ն արգելանքի տակ դնելու եւ պահպանման ժամկետը հաշվվում է օրերով եւ ժամերով՝ սկսած հատուկ տարածքում դրա տեղավորման պահից:

Եթե տրանսպորտային միջոցն արգելանքի վերցնելու պահից 120 ժամվա ընթացքում՝

ա) վերացվում է արգելանքի տակ դնելու պատճառները, ապա ոստիկանությունն անմիջապես տ.մ.-ը հանում է արգելանքից.

բ) չի վերացվում արգելանքի տակ դնելու պատճառները կամ վերացնելով արգելանքի տակ դնելու պատճառները՝ տ.մ.-ը չի հանվում հատուկ տարածքից, ապա տ.մ.-ի պահպանման ծախսերը մարելու նպատակով տ.մ.-ը վարորդից (տիրոջից, տիրոջ ներկայացուցչից) հաջորդող յուրաքանչյուր լրիվ օրվա համար գանձվում է վճար՝ 500 դրամի չափով:

Եթե տ.մ.-ը պատճառ է դարձել ճանապարհատրանսպորտային պատահարի առաջացման համար կամ դրա մասնակիցն է, ապա տ.մ.-ն արգելանքի տակ դնելու ժամանակ գործում է գործի քննության ավարտից հետո տ.մ.-ի վարորդին (սեփականատիրոջը, սեփականատիրոջ ներկայացուցչին) ծանուցելուց 120 ժամ հետո:

Տ.մ.-ը հատուկ տարածքից հանելը չի նախատեսում վարչական իրավախախտման վերաբերյալ տուգանքի պարտադիր վճարումը: Տուգանքը վճարվում է օրենքով սահմանված ժամկետներում: